من ذاكرتي

بسم الله الرحمن الرحيم

الحمد لله رب العالمين والصلاة والسلام على اشرف الخلق والمرسلين سيدنا محمد وعلى آله وصحبه اجمعين

اخواني حبيت اغير بالمواضيع شوي فقلت اكتب شوي ممااختزنه في ذاكرتي وساكتب عن ايامنا وايام ابنائنا

ايام المدارس

كنا على ايامنا نصحى الصبح بدري حتى نروح عالمدارس ونلاقي الوالدة الله يحفظها مجهزه الفطور ويكن من حواضر البيت مثل لبنهاو زيت و زعتراو جبنه او بيض مقلي وشاي ونفطر وما شاء الله علينا بدون ما واحد يحكي كلمه

اليوم اولادنا تلاقي عالسفره كل ما ذكرت سابقا وزيد عليكن كمان المرتديلا والبسطرما والمربى وجميع ما تشتهي الانفس وتلاقيهم كل واحد مو عاجبه ويحكي من جهته

على ايامنا كنا نروح عالمدرسه معنا سندويشه واحيانا ما يكون معنا او يعطينا الوالد مصروفنا بالكتير يوصل مصروفنا للشيكل او ما يعادل ريال وما حدا يحكي غير الحمد لله

اليوم بيروح الطالب عالمدرسه ومعه سندويشه وتفاحه وخياره وشي تسالى من هون وشوية شيبس من هناك ومصروفه يتعدى الشيكلين الثلاث ويا ريت عاجبه شي

ايام الشباب

على ايامنا كان الواحد منا اوالوحده تشتري لبسه وحده خلال السنه وتلبس هي واختها هو واخوه وعايشين مبسوطين وما شاء الله علينا

اليوم تلاقي الواحد يشتري كل شهر لبسه وخزانته مليانه من جميع الاشكال ويا ويلهم الاهل اذا مره ما اشترو يصير مسكين ومن زمان ما اشترى شي


على ايامنا كان اللبس لبس عن جد ولا شي مشروط من الجنب ولا من الركبه ولا الخصر الساحل ولا الالوان هني يادوب الابيض والاسود او كحلى وان كترت زهري ولا احمر

اليوم ما شاء الله تلاقي كل شي فيه مشروط من جميع الجهات والخصر الساحل اللي وللاسف الواحد ولا الوحده يكونو لا بسينه وعذرا على الكلمه (تكون ملابسهم الداخليه مبينه)

ولا الالوان ما شاء الله لا تعد ولا تحصى حتى وصلت الالوان للبس الشرعي فاصبحت حتى العباءات والجلابيب بالوان غير شكل


غلاء المعيشه

ايامنا كنا نوخذ المصروف نشتري فيه خير الله وفيه بركه يعني كنا نشتري كاس الايس كريم بنص شيكل او نص ريال ونقول الحمد لله

اليوم ما شاء الله كاس الايس كريم يتعدى سعره الريالين او الثلاث وتنجبر تشتري ويا ريته عاجبهم


الافراح والمناسبات

على ايامنا كان العرس عرس عن جد والفرح فرح كانت العيله تتجمع في بيت العروس او العريس ويفرح الكل وينبسط


اليوم لا يتجمعو ولا شي كل واحد يطلع من داره على قاعة الافراح وخلصت وخلصنا


على ايامنا كانت العروس يجيبوها من الصالون على بيتهم وتضل قاعده وتستنى حتي ييجي هالعريس ويوخدها ويطلع ومو بس هيك وتبكي حتى يتورمو عيونها وكمان تكون بدلتها مستوره وما شاء الله عليها

اليوم ما شاء الله تدخل العروس على القاعه ومن وقت ما تدخل حتى تطلع وهي ترقص وما تقعد مكانها نص ساعه على بعض وغير البدله تكون نص بدله من كتر ما هي معريه غير القرايب كمان اللي يكون كل وحدة منهم لابسه وتقول يا ارض اهتدي ما عليكي قدي وكانه عرض ازياء مش عرس

هذا اللي قدرت عليه اليوم ويا ريت الكل يشارك بالموضوع

وما تنسونا من دعائكم