اخواني تبون الشفاء من جد والا متكاسلين ؟؟؟

ابقولكم على تجربة وحده جزاها الله خير كتبتها في احد منتديات الرقيه ونورت للي عنده عزيمه دربه ببرنامجها اليومي .... تجربتها بأسلوبي لأني ماحفظت موضوعها بس والله كانت قصتها مميزه من ضمن تجارب مرضى كثيره مع العلاج

تقول اصابها المرض فجأه وهي تجري مستعجله بتلحق على جامعتها ومن ذيك اللحظه تغيرت حياتها فوق تحت اهتزت بعنف وهي تجري بالحوش ( شكلها داعسه على شي مو زين ماسمت )
المهم استمر معها المرض احدعشر سنه وهي تتقلب في ويلاته ومن سيء الى اسوأ لحد ماقررت علاج نفسها بنفسها ...تأثرت دراستها شحب لونها اعتزلت الناس حتى اهلها مع الوقت صارت حالتها صعبه ... طبعا خلال هالسنين تروح لرقاه تتحسن شوي ثم ترجع للأسوأ عند اي غلط او تقصير ومن فينا كامل

المهم قررت تعالج نفسها بنفسها وبعزم وبقوه اراده كبيره ماشاء الله عليها وصارت ترقي نفسها كل يوم تخيلوا كم ساعه ... خمس ساعات مابين رقيه وقراءة قرآن ثم اغتسال بماء مقرؤء عليه وسدر وادهان بزيت مقروء فيه وخاصة انها متفرغه لانها بسبب المرض ماتزوجت ....خمس ساعات كل يوم قراءة قرآن ورقيه مع اكثار الطاعات قدر ماتستطيع والاستحمام بشكل يومي والدهن كل يوم وكانت تقرا على ماءها بنفسها تقول بالبدايه يجيني خواطر في نفسي ان قراءتي ماراح تنفع واطنشها تقول ان هذا كله من الشيطان والجن عشان يشككونها بعلاجها ... اثره كان عليهم مثل النار بس عندهم جلد الله أكبر عليهم ....

المهم ومع هذا البرنامج المكثف تقول ثماني شهور الا وهي أحسن من قبل الإصابه ثمان شهور بس ياللي تضيع من اعماركم سنين في انتضار الشفاء وانتم لاحراك ... شوية جهد ثم طفشت مافيه فايده ....وتقول في تجربتها مع هاللبس اللي خرج منها شفيت من اعين عديده أصابتها قبل المرض و خلاله
كيف عرفت انها شفيت فجأه وهي تتوضأ بالحمام للصلاه شمت بأنفها ريحة احتراق شي قويه محد شمها غيرها وحست انها انولدت من جديد وانها كأنها عايشه بالجنه من السعاده والإنشراح ورجعت حياتها احسن من اول
اللهم اتم عليها الشفاء وراحة البال وجزاها الله خير على ذكر تجربتها ويالله تحمسوا مثلها وابدوا بعلاج نفسكم بنفسكم علاج مكثف .. وشوفوا كيف كانت في معركه وبالنهايه انتصرت انتصار عظيم ماشاء الله تبارك الله


وانشاء الله تبشرونا بعد كم شهر بالشفاء التام