المشاركة الأصلية كتبت بواسطة wd123

أنا عضوه قديمه وجديده في نفس الوقت
المهم بخبركم عن سالفه صارت لي وأنا في عمر 12 إلى 15 تقريبا , كنا أنا وخواتي ننام في غرفه وحده , وكان بيتنا قديم جدا , وبين باب الحمام - الله يعزكم - والطوفه في مثل فتحه طوليه , فليل إذا أنتبهنا من النوم لأي سبب نشوف جسم حرمه لابسه ثوب أبيض , - ثوب نسائي - مثل إللي يلبسونه جداتنا من زمان في الخليج , هذا الحرمه طول الليل تظل رايحه جايه رايحه جايه , طبعا كنا نخاف ونتغطى بالبطانيه لين الصبح, وظلينا على هالحاله لين أنتقلنا بيتنا الجديد.
وهذي سالفه ثانيه : مره كنا واقفين أنا وأبوي الله يرحمه في الحوش فليل في نفس بيتنا القديم , طاحت عيني على زاوية المطبخ , وأشوف بنات ثنتين في الزاوية , الثنتين لابسين بناطلين وبلايز , حتى وحده لين الحين أذكر لبسها كانت لابسه فوشي وأخضر , والثانيه ماأذكر ألوان ملابسها . فأنا لما شفتهم أول مره لفيت راسي , وفي نفس اللحظه أنتبهت إني شفت شي في الزاويه , طالعت مره ثانيه صوب الزاويه شفتهم وفي لحظه أختفو , بس مادري ليش ماخفت منهم , مثل ما أخاف من أم الثوب الأبيض.
سالفه ثالثه : كنت في بيت أختي الكبيره وأنا وياها جالسين على السرير نسولف , وشوي ولا أشوف هذاك الطفل إللي يركض , دخل من البلكونه وطلع من باب الغرفه , عمره تقريبا سنتين أو ثلاث سنين , وأختي بوقتها ماكان عندها طفل بهالعمر , فأشرت على الطفل أقول لأختي شوفيه وش حلاته يهبل , لابس بيجامه بيضا ومنقطه ببنفسجي ,بس أعتقد أختي ما قدرت تشوفه . وبعد ماخفت منه وكملت السوالف معاها ولا كأني شفت شي .
سالفه رابعه : في نفس بيت أختي الكبيره شفت واحد يمشي في الصاله العلويه لا بس دشداشه بيضا , بس مافيه راس , مر علينا وخلال ثواني وأختفى . على فكره بيت أختي موحش , وخصوصا فليل.
وهذي آخر سالفه عندي : مره كنا كلنا متجمعين في الحوش فليل والجو حلو ونسولف والف عاديه وناكل ومستانسين , المهم جابو سيرة الربع , فالكل كان يسولف بتحفظ وخوف , إلا أخوي الله يهديه قعد يقول أنا ماأخاف منهم , وهم أصلا مايقدرون يسون شي وووووووو إلخ من هالكلام , وبعد شوي تركنا ودخل المخزن بيجيب شي , رجع لنا والدم يسيل من جبهته , سألناه وش إللي صار , قال مادري أول ما دخلت المخزن حسيت بضربه على جبهتي وطلعت على طول .
هذي السوالف إللي عندي وإللي أذكرها الحين , لين ذكرت سوالف ثانيه برجع لكم .