دار الرقية الشرعية - فــــــــــــــــن الإقــنـــــــــــــــاع

فن الإقناع

قال عنه علماء التنمية البشرية " إن الذى يمكنه أن يفعل هذا يمتلك العالم كله ومن لا يقدر فإنه يسير فى طريق موحش "

يفسر هذا الفن كلمة رائعة " من الضرورى تزويد السنارة بما يناسب السمك "

فمثلا لو انك بتحب الموز وذهبت لصيد السمك ووضعت فى السنارة موزة لو انتظرت للسنة الجاية مش ممكن تصطاد ربع سمكة لكن لو وضعت فى السنارة دودة شوف ممكن تكون حصيلة السمك ايه فى سلتك بعد كام ساعة .

عشان كده
الطريق الوحيد للتأثير فى شخص آخر هو ان تتحدث عما يريده هو وكيف يحصل عليه

يقول البروفيسور هارى اوفر ستريت " ينشأ العمل بصورة اساسية مما ترغب فيه وافضل نصيحة يمكن اعطاؤها للذين يريدون الاقتناع سواء العمل , المنزل , واى مكان هى ان تثير فى الآخر رغبة ملتهبة

" إن من يفعل هذا يمتلك العالم كله ومن لا يقدر فإنه يسير فى طريق موحش "

وبكرر مرة تانية ان الطريق الوحيد للتأثير فى الناس هو التحدث عما يريده الشخص الآخر

مثلا لو انتى عايزة ابنك يفطر قبل ما يروح المدرسة وهو رافض وكل اللى بيفكر فيه انه يتفرج على الكرتون....
فيه طريقتين ممكن تتصرفى بيهم....
الاولى : اللى انتى متعودة عليها انك ترفعى صوتك وتتنرفزى عليه وساعتها هيعاند ويصمم على رأيه وتبقى خسرتى احترام ابنك وقدرتك فى السيطرة على الموقف وتكونى خسرتى القرب من ابنك ويبقى كل حاجة هيعملها خوف فقط وده خطأ كبير فى التربية .....

الثانية : انك تقترحى عليه انه لو فطر فى وقت كويس من غير تضييع للوقت هيفضل عنده وقت يتفرج بيه على الكرتون اللى هو بيحبه وبكدا هيفطر ابنك من غير ما يتعبك وتبقى نفذتى اللى انتى عايزاه وهو عمل اللى هو عاوزه وكمان قربتم من بعض وتكونى الصديقة الاولى لإبنك لإنك عارفه هو عايز ايه ............

عشان كده بكرة اول لما تكون فى موقف عايز تقنع فيه حد انه يعمل حاجة معينة
اسأل نفسك
" كيف يمكننى ان اجعله يرغب فى القيام به ...?! "

مثلا لو عايز تقنع ابنك المراهق انه يبطل سجاير لو حاولت تجبره بالقوة مش ممكن تنجح لأنه لو بطلها قدامك مش هيبطلها من وراك

لكن لو دورت هو بيحب ايه فمثلا لقيته بيحب السباحة وقولتله ان السباحة رياضة جميلة ومفيدة وسيدنا عمر وصانا نعلمها لأولادنا لكن المدخن مش هيقدر يكون سباح ناجح ويكسب فى البطولات وانه لو بطل تدخين هتشترك له فى اقرب نادى
وتخيل انت النتيجة اللى هتحصل عليها .........

شوف هنرى فورد صاحب شركة فور العالمية للسيارات قال إيه
"اذا كان هناك سر للنجاح فانه يكمن فى القدرة على معرفة وجهة نظر الشخص الآخر , ورؤية الاشياء من زاويته ومن زاويتك ايضآ "

يعنى مش لازم يكون كل همك تنفذ الى فى دماغك وبس لازم تعرف ان الشخص الاخر له افكاره ووجهات نظره وقيمه اللى شايفها صح وانت لازم تحترم ده لأن مفيش شخصين زى بعض فى كل حاجة ومن حكمة ربنا سبحانه وتعالى انه خلقنا مختلفين .

يبقى انت لازم تفهم وجهة نظر الشخص الاخر وتتعلم منه كمان لو هو صح وتبقوا بتكملوا بعض .

اودين دى يانج قال " الرجل الذى يستطيع وضع نفسه فى مكان الاخرين ويمكنه فهم كيف تعمل اذهانهم لا يحتاج ان يقلق على مستقبله وما يدخره "

تذكر دائمآ
" قم بإثارة الرغبة لدى الشخص الاخر إن من يقدر على ذلك يمتلك العالم كله ومن لا يقدر فإنه يسير فى طريق مظلم "